Kreu i milicisë siriane kurde ka deklaruar se vendosjet ushtarake turke pranë zonave kurde në Sirinë veriperëndimore janë një shenjë për ‘shpallje lufte’, e cila mund të shkaktojë përplasje brenda pak ditësh.

Zëvendëskryeministri turk Numan Kurtulmus në lidhje me këtë deklaratë ka reaguar duke thënë se ‘vendi i tij nuk po shpall luftë’, por ka shtuar se Turqia është e gatshme t’i përgjigjet çdo lëvizje armiqësore nga YPG, të cilën ai e përshkroi si një ushtri në shkallë të vogël e formuar nga Shtetet e Bashkuara, transmeton portali arbresh.info

I pyetur nga Reuters nëse ai priste një konflikt me Turqinë në Siri veriore, ku dy palët kanë shkëmbyer zjarr artileri në ditët e fundit, komandanti i YPG, Sipan Hemo akuzoi Turqinë për përgatitjen e një fushate të madhe ushtarake në zonën e Aleppos dhe Afrin.

“Këto përgatitje kanë arritur nivelin e një deklarate lufte dhe mund të dërgojnë në një konflikt brenda ditëve në vijim”, ka thënë ai.

“Ne nuk do të qëndrojmë duarkryq karshi agresorit potencial”, ka shtuar ai.

Politika e Turqisë në Siri veriore është përqendruar në përmbajtjen e ndikimit në rritje të grupeve kurde që kanë krijuar rajone autonome që kur filloi lufta e Sirisë në vitin 2011.

Gjatë javëve të fundit, Turqia ka dërguar përforcime në zonën veriore të Aleppos./Arbresh.info